"احضان ببلاش" : لافتة ترفعها فتاتان للمارة في الشارع

نشره fatthy في أربعاء, 2013-06-19 15:59

أنا "ح" نزلت مع صاحبتى "ف" يوم 16-6-2013 معانا لافتتين واحده مكتوب عليها ان "اليوم جميل و يستحق ابتسامتك" و التانيه مكتوب عليها "أحضان ببلاش".

كان فيه ناس لطاف حضنناهم و حبيناهم. كان فيه ناس مش لطاف أوى كانوا بيقولولنا كلام مسىء اعتراضاً على االى احنا بنعملوا.أولاد الشوارع اتلموا حوالينا كتير أوى فا قررنا نغير مكاننا و عملنا كده فعلاً بس استمر الكلام و التعليقات السخيفه فضلنا واقفين لحد ما جه واحد كان واقف فى المكان اللى احنا كنا واقفين فيه الأول و اعترض على احنا بنعمله و قاللنا "أقلعوا الحجاب طيب",جه ورانا تانى و نزل واحد صاحبه من العربية و طلب منى حضن فرفضت فقعد يتحرش بيا لفظياً. دورت وشى الناحيه التانيه و رفعت لافتتى. رجع الولد اللى كان سايق و خبطنى بعربيته وقعنى على الأرض. قمت أنا و "ف" خبطنا على العربية و قررت انى أكسرله الإزاز علشان أعلمه درس فا كسرت بكوعى الإزاز اللى قدام. نزل من العربية و شتمنى شتايم قذره و بعدين مسك "ف" من الطرحة و بدأ يضربنا احنا الاتنين. لمح الكاميرا بتاعت "ف" فقرر يسرقها كتعويض على إزاز عربيته مسكت فالكاميرا أنا و هى و كمل هو ضرب فينا. عرفنا نخلص نفسنا منه و وقفنا بعيد نطلب البوليس و قعدنا نحاول لكن و احنا واقفين جه راجل و ضرب فاطمة بالقلم من بعيد و مشى و بعدين اتعملت قصة ورا التانيه علشان الناس تقنعنا اننا نتنازل عن اننا نعمل محضر و نروح بيوتنا و لكننا رفضنا. جه واحد معدى فى الشارع يشتم وواحدة تانيه تتهمنا باننا بنبيع لحمنا رخيص و احنا واقفين فى الشارع مستنيين البوليس. جه البوليس و اخدنا على القسم. دخل الولد بسيناريو اننا كنا بننادى لقلة لاأدب و هو كان خايف على سمعة بلده و بيدافع عنها. الظابط قال ان اللى احنا كنا بنعمله ده ضد القانون و ان احنا بننادى للفسوق فى مكان عام. والدى جه و هو كان المحامى بتاعنا خرجنا احنا الاتنين. تانى يوم رحنا النيابه و هناك وكيل النيابه قاللى انه هيتلبسلنا قضية آداب قدام القضية بتاعة الولد انه ضربنا. "ف" أهلها مكانوش هيستحملوا ان بنتهم هيتعملها قضية آداب فا وافقت على فكرة المحامى ( والدى ) اننا نتنازل. والدى بعد ما اتنازلنا عن المحضر راح صلح للولد عربيته و دفعله تمن الإزاز اللى أنا كسرته. دفع والدى للولد فلوس يشكره على انه ضربنى, على انه ضرب بنته.

الحب في شرعهم حرام و لكن الحرب و القتل و الانتهاك حلال و قانونى. الولد اللى ضربنى اسمه عمر محمد كمال محمد أبو طالب و طالب فى كلية مودرن أكاديمى. نزلت أنا و صحبتى نحضن الناس و نحبهم من غير سبب معين و من غير انتظار لأى مقابل فاتضربنا.